Cognats i topònims relacionats

Hai diversos resultados do xenitivo GUTI en Galicia: Gude (Ribeira, Co, Lugo, Lu), Gudes (Xinzo de Lima, Ou), Os Gotes (Monfero, Co). A forma feminina rexístrase no portugués en compostos: Fontes de Goda (Braga), Casal da Goda (O Porto). 

Gota puido presentar unha desinencia -a(ne), como vemos en "ubi dicunt Gutani" 982 TSamos. A partir do xenitivo (*GOTANIS) ou do acusativo plural (*GOTANES) orixinouse os actuais topónimos Godás de Cima e Godás do Río (Longoseiros, O Carballiño, Ou), que, pola súa parte, xeraron o apelido Godás.

Godos (parroquia de Caldas de Reis, Po) pode proceder dun plural do nome persoal ou dun adxectivo usado con valor étnico.

Goto/Godo, coa flexión xermánica -o(ne), produciu o nome persoal medieval Godon, normalmente feminino, que deu lugar ao topónimo Godón (Arteixo, A Laracha, Mazaricos e O Porto do Son, na Co, e Arbo, Po). Deu lugar ao apelido Godón, con 86 portadores, que procede na súa maior parte do topónimo do Porto do Son, pois está distribuído sobre todo na Península de Barbanza; os portadores de Negreira poderían ter como foco o do concello de Mazaricos.

Con distinta evolución (caída do -n-), GOTONE (ou GOTONI) orixinou o topónimo Godoi (A Estrada, Po), que tamén xerou apelido. Documéntase desde o séc. XIV: Johán de Godoy 1396 THSantiago, Pero de Godoy, notario público jurado ẽna vila de Noya 1434 DocNoia

Con derivación: 

• -INA/-INU: A Gudiña (concello ourensán),
• -ELLA/-ELLU: A Godela (Cerdedo Cotobade, Po). Tamén portan este sufixo os port. Montegodel (Lisboa) e Monte Godel (Lisboa), que mostran influencia mozárabe na evolución.

En composición:

• con VILLA: Vilagude, na Estrada (Po), Vilacote, en Castroverde (Lu); 
• con BUSTU: Besgode (véxase MartínezLema_2018), en Begonte (Lu);
• con VALLE:  O Valgote, en Miño (Co).

Foi tamén frecuente en antropónimos altomedievais con diferentes raíces onomásticas como primeiro elemento de composición (ata 43 formacións no HGN § 146), o en segundo (Bagude, Sergude/Seragude: véxase HGN § 35, 244) bastantes dos cales deixaron así mesmo descendentes toponímicos.