Aldea é un dos topónimos máis frecuentes no NG: só, con artigo ou en composición, está presente en 134 núcleos. Con todo, este préstamo árabe ten presenza relativamente tardía na documentación galega, pois, para referirse a entidades de poboacións galegas só aparece no séc. XIII: (“in aldea de Pineyra de predicto monasterio” a.1223, CDFPallares), pero experimentou unha gran difusión a partir desa época (Boullón_2021). É, por tanto, un préstamo romance relativamente tardío no léxico e na toponimia galega.